“Лантуун дохио” ТББ-ын гишүүн О.Мишээлийн “Хүчирхийллийг тэвчдэггүй ХҮН БАЙ” хөдөлгөөний талаарх уулзалтын үеэр тавьсан илтгэлийг хүргэж байна.
“Лантуун дохио” ТББ-ын гишүүн О.Мишээл:
“Би долоо дахь жилдээ “Лантуун дохио” ТББ-д ажиллаж байна. Надаас, Ганжавхлангаас, энэ постер бариад зогсож байгаа залуучуудаас хүмүүс нэг утгатай асуулт асуудаг. Тэр нь: “Чи яах гэж ийм ажил хийж байгаа юм бэ? Чи наад цалингүй ажлаа хийгээд яах гэж байгаа юм? Та нар юу өөрчилж чадах юм?” гэдэг. Тэр асуултанд “Би өөрийнхөө төлөө, хүүхдийнхээ төлөө хийж байгаа юм” гэж хариулдаг.
Ийм тогтолцоотой байхад Золбоот гэдэг залуу Фэйсбүүктээ бичээд, нэг шөнийн дотор 3000 хүнд хүрч, 1500 гаруй удаа шэйрлэгдсэний дараа “Нүдээ нээ” аян эхлэх болсон шалтгаан болсон.
Өнөөдөр миний хүүхдэд ямар нэг асуудал тулгараагүй учраас надад хамаагүй гэж орхиж болохгүй. Энэ хүнд нөхцөлд байгаа, хүчирхийлэлд өртөж байгаа тэр хүүхдүүд 20 жилийн дараа таны хүүхэдтэй хамт амьдарч, нэг өрөөнд хамт суугаад ажиллаж магадгүй. Тийм учраас би амиа бодож өөрийнхөө хүүхдийн төлөө үүнийг хийж байгаа юм. Бидний зүгээр л нийгмийн сүлжээний араас уурлаж, бухимдаж байгаа нь өөрчлөлтийн төлөө гар бие оролцож байгаа зүйл биш. Өөрсдийн биеэр хичээл зүтгэл гаргаж байж энэ өөрчлөлт маш удаан хугацаанд маш багаар гарна.
Гурван жилийн өмнө 2017 оны арваннэгдүгээр сарын 1-нд “Нүдээ нээ” хөдөлгөөнийг зарлаж эхлүүлж байлаа. Энэ хөдөлгөөнд маш олон хүн оролцсон. Зүгээр нэг ТББ-ын залуучууд, энгийн иргэд ямар өөрчлөлт гаргаж чаддаг вэ гэдгийг харуулж чадсан.
Зөвхөн энэ хөдөлгөөнөөр 15 мянган хүний гарын үсэгтэй шаардлагаар гурван сайдын гарын үсэгтэй тушаалыг өөрчилж чадсан. Өмнө нь 18 нас хүрээгүй хүүхэд хүчирхийлэлд өртөөд Шүүхийн шинжилгээний төвд очоод шинжилгээ өгөх гэхээр мөнгө нэхдэг байсан. Тэр хүүхэд мөнгөгүй ирвэл шинжилгээг нь авахгүй гээд явуулдаг байсан. Ийм тогтолцоо ажиллаад байна. Зөвхөн нэг жишээ нь энэ. Ийм тогтолцоотой байхад Золбоот гэдэг залуу Фэйсбүүктээ бичээд, нэг шөнийн дотор 3000 хүнд хүрч, 1500 гаруй удаа шэйрлэгдсэний дараа “Нүдээ нээ” аян эхлэх болсон шалтгаан болсон.
Энэ залуу аавыгаа Шүүх шинжилгээнд үзүүлэх гээд очсон байхад жаахан хүүхэд ирчихсэн, сандал дээр хэвтэж байсан. Цаана нь юу болоод байгааг сонсоход хүүхдээс 10 мянган төгрөг нэхсэн. Хамт дагуулж ирсэн согтуу хүн нь надад мөнгө байхгүй шд” гэхэд “Тэгвэл уучлаарай, шинжилгээ авч чадахгүй” гэсэн юм билээ. Иргэнтэйгээ, ирээдүй болсон хүүхэдтэйгээ ингэж харьцаж байна.
Миний асуудал танд хамаатай, таны асуудал надад ч хамаатай.
Тэгээд тэр залуу “Миний хүүхэд биш, миний дүү биш” гээд нүдээ аниад өнгөрч болох байсан боловч өмнөөс нь мөнгийг нь төлөөд, тэр хүүхдийг шинжилгээнд оруулчхаад бухимдаад, тэр бодол нь арилахгүй Фэйсбүүктээ бичсэн нь “Нүдээ нээ” хөдөлгөөний эхлэл болсон. Энэ бол ганцхан хүний ганцхан үйлдэл. Бидний өдөр тутамдаа л хийдэг үйлдэл. Энийг л бид оролцоо гээд байгаа юм. Энэ нь маш том өөрчлөлт авчирсан.
Одоо ч бид тасралтгүй дуугарсаар, орилсоор, хашгирсаар баймаар байна. Энэ удаад бид нэрийг нь өөрчлөөд “Хүн бай” хөдөлгөөн эхлүүллээ.
“Хүн бай” гэдэг нь маш олон утгатай. Хүчирхийллийг тэвчдэггүй хүн байя. Хүчирхийллийн хажуугаар дуугүй өнгөрдөггүй хүн байя, надад хамаагүй гэж нүдээ аньж өнгөрдөггүй хүн байя. Хүүхдэд ээлтэй хүн байя. Зөвхөн миний асуудал гэж дотогшоо өөрийнхөө хувийг боддоггүй хүн байя.
Бид хамтдаа энэ нийгмийг бүрдүүлж байгаа учраас энэ танхимын буланд зогсож байгаа хүний асуудал хүртэл надад ч хамаатай гэсэн үг. Өнөөдөр эсвэл нэг жилийн дараа биш байж болно. Ямар нэгэн хугацаанд хоорондоо огтолцоно.
Энэ оны эхний найман сарын байдлаар гэмт хэргийн улмаас 762 хүүхэд хохирч, 82 хүүхэд нас барж, 290 нь гэмтсэн. Гэр бүл салалтаас 5000-6000 хүүхэд өнчирч, эдгээрээс 500 орчим нь бэлгийн хүчирхийллийн зонхилох хохирогч болж байна. Дахиад бидний л асуудал. Тийм учраас бүгдээрээ дор бүрнээ маргааш мартдаггүй, нөгөөдөр мартдаггүй, хариуцлагатай хүн байя. Бидэнд бүгдэд нь ах дүү, найз нөхөд, хамаатнууд, хамт олон байгаа. Бүгдэд нь энэ асуудлыг ойлгуулъя.
Миний асуудал танд хамаатай, таны асуудал надад ч хамаатай. Тийм учраас бүгдээрээ хүн байя” гэлээ.
Эх сурвалж: www.gogo.mn
- Get link
- Other Apps
- Get link
- Other Apps
Comments
Post a Comment