Дэлхийн ТED-д шалгарсан анхны монгол хүн Б.ХУЛАН

 

Шинжлэх ухаан, боловсрол, технологи, бизнесийн салбаруудын шилдэг инноваци, тогтвортой хөгжлийн шийдлүүдийг сэдэгч, бүтээгчдийн богино илтгэлийг дэлхий даяар сая сая хүмүүст түгээдэг TED арга хэмжээ нь 1990 оноос хойш жил бүр зохион байгуулагдаж байгаа бөгөөд Монгол улсаас анх удаа Батхуягийн Хулан илтгэл тавихаар шалгарчээ.

Албан ёсны TED платформ болон үндсэн тайзнаа илтгэл тавих шалгаруулалт нь дэлхийн өнцөг булан бүрт ажиллаж буй 600 мянга гаруй төсөл, хөтөлбөр удирдагч, манлайлагч нарын дунд хагас жилийн турш, олон шат шалгуураар үргэлжилсэн бөгөөд шилдэг 12 хүн өөрсдийн дуу хоолой, уриалгаа дэлхий даяар түгээх боломжтой болсон байна. Б.Хулан нь энэхүү шилдэг 12 хүний нэгээр шалгарснаар дэлхийн TED-д илтгэл тавьж буй анхны Монгол хүн болж байгаа юм. 

Тэрээр мэдээлэл харилцааны стратегич, зөвлөхөөр ажилладаг бөгөөд өнгөрсөн 8 жилийн хугацаанд олон улсын болон дотоодын томоохон төсөл, бизнесүүдийн брэндинг, маркетингийн бодлого, төлөвлөлтийг удирдан ажилласан залуу боловсон хүчин юм. Сүүлийн жилүүдэд Б.Хулан нь Малайз, Филиппин, Индонез зэрэг орнуудын үндэсний хэмжээний төслийн удирдлагын чуулга хурлуудад Монгол улсаас анх удаа уригдан төслийн мэдээлэл харилцааны тогтвортой бодлого, нөлөөллийн хүрээнд илтгэлүүдийг тавьжээ.

Энэ удаагийн TED арга хэмжээ нь АНУ-ын Сиатл хотод зохион байгуулагдахаар төлөвлөгдөж байсан хэдий ч Ковид-19-ийн нөхцөлөөс шалтгаалан онлайнаар зохион байгуулагдаж буй юм. 12 илтгэгч тус бүр өөрсдийн богино илтгэлийг урьдчилан зайнаас бичиж, хоёр өдрийн турш зохион байгуулагдах TED@PMI: Action + Impact арга хэмжээний үеэр шууд хэлэлцүүлгийн хамт цацах юм. Б.Хулангийн илтгэлийн сэдэв нь "Enduring takeaways from the nomadic life of Mongolians" буюу "Нүүдэлчин ахуйгаас тээж эзэмшсэн эрдэм ухаан" юм. Мөн түүний богино илтгэлийн зураг авалтыг Монгол ТВ-ын баг болон TED-ийн төв оффисын техникийн баг бүхий нийт 20 орчим хүн 4 улсаас холбогдон зайнаас гүйцэтгэжээ.

Шилдэг 12 илтгэгчийг сонсохоор дэлхийн өнцөг булан бүрээс 25,000 гаруй хүн оролцохоор бүртгүүлжээ. Та ЭНД даран үнэ төлбөргүй бүртгүүлээрэй. Арга хэмжээ 2020 оны 9 сарын 25-26-ны өдрүүдэд 9:00-13:00 (EST, Зүүн цагийн бүс), Монголын цагаар 21:00-01:00-ын хооронд зохион байгуулагдах юм.

Мөн Нью-Ёорк хот дахь TED төв оффисын редакц Б.Хулангийн илтгэлийг хөтөлбөрийн нийт 12 илтгэлээс онцлон 2020 оны 9 сарын 29-ны 11:00 цагт өөрсдийн албан ёсны вэбсайт www.ted.com дээр байршуулахаар сонгожээ. TED арга хэмжээнд тавигдсан нийт илтгэлүүд албан ёсны вэбсайт дээр байршихын тулд цөөнгүй шалгууруудыг илтгэл тавигдсанаас хойш давах ёстой байдаг ба энэ процесс 8-10 долоо хоногийн турш үргэлжилдэг аж. Харин Б.Хулангийн илтгэл нь албан ёсны вэбсайт дээр шууд нийтлэгдэж байгаа нь онцлууштай үйл явдал юм.

Монгол залуус маань TED-ийн төв оффисоос эрх аван, өөрсдийн хувилбар бүхий TEDx салбар арга хэмжээг дотоодын шалгуур, зохион байгуулалтаар жил бүр зохион байгуулдгийг залуус маань андахгүй болсон. Та бүхэн дэлхийн TED-н үндсэн тайзнаа шалгарсан Б.Хулангийн илтгэлийг 2020 оны 9 сарын 26-ны Бямба гарагт 23:00 цагаас энэхүү холбоосоор  бүртгүүлэн ҮНЭ ТӨЛБӨРГҮЙ үзэх боломжтой.

Эх сурвалж: www.gogo.mn